A štraticèddra sàgghja
subba ‘na timpa u cummèntu
doppu l’Alfieri a curva
addùvi mina fort’u ventu.

I ddrà vidènnu all’arva
špuncìri subb’u mari
u suli quetu-quetu
t_addùni d’u Signuri.

Si po’ taliji a ponentu
ara Sila vers’a sira
u suli si ricògghja
‘mbita ara prighèra.

‘Na capa i pezza dìlica
D’a grigghja špuntànnu
ccu’ ‘na fremma fora e dinta
a tti rapìri surridènnu.

‘U mmì vulissa šbagghjàri
mi para chiru risu
c’ancuna cosa ten’i fari
ccu’ ri Santi in Pararìsu.

A duminica a ri deci
a missa aru cummèntu
ti para ‘n’atu mùnnu
ccì minti cchjù sentimèntu.

Tutt’a jornata
pijannu i Maria i manèri
a tu per tu ccu’ ru Signuru
citta-citta, pacènza e prighèri.

L’uri pàssanu
a ru signàlu i campanèddra
cusènnu e ricamànnu e Paternòstu
fin’a quànnu špùncia ‘na stìddra.

Cchì vita è chista?
‘U nn’è ca l’anu far’a forza
l’ànnu scigghjùta loru
ppì far’u diavulu morza-morza.

Chista è ‘na šcola i vita
ca sulu a ri ‘mparàri
cchjù megghju i tutti l’ati
a štrata ppì d_amàri.

Chista è n’accurciatùra ppì ru Signuru.