Donna Glòria binidìtta
ca šcattìja cchjù i ‘na marmìtta
si ti cumpòrti bbonu ccu’ d’iddra
ti tena comu ‘na picciulìddra
ma si ccì fà ‘nu menzu tòrtu
pèjiu ppì ttija, statt’accòrtu.

S’à špusàtu i d’u špitàlu ‘nu primàriu
ca vena d’a marin’i Catanzàru.
Adduvi a minti minti iddra sa fàri
e ppì chistu c’a Pepè u fà scialàri.

Iddr’a matina fa fatic’a ssì lizàri
m’a ra šcola add’i jir’a fatigàri.
Fa ‘nsegnant’i ‘na materia štràna
c’‘u ‘mm’arricordu comu si chjama.

A sira ma però ‘u riesci’a durmìri
c’u libbrettìcchju i Nìnu a ddì lejìri.
Quannu l’affrìggia ‘nu pinzèru
si vid’annavòta, i fàccia è sincera
Ma quannu ccì ggira e s’accònza bbonu
para ‘a megghja fimmin’i Cutròni.