A gghjèsa i Sanciusèppi

Jènnu d’a gghjàzza
ara sagghjùta d’u castèddru
cchjù ddrà d’a ‘Mmaculàta
‘na gghjesicèddra.

T’a trovi facceffrùnta
tuttannavòta
ti ‘ncuriusìscia
puru c’‘u si devòta.

Ppì ri nòbbili
l’avunu fravicàta
armènu chista
èr’a numinàta.

Parìva ‘na šciòddra
‘nu paru d_anni arrètu
a coru si l’à pijàta
don Sarvatùr’u prèvitu.

Ccu’ ri limòsini
e contribbùti
tantu c’à fattu
ca su nesciùti.

S’a vidi mo’
com’è sanàta
a vuccapèrta
pari ‘ncialàta.

I cosi antichi
‘u nnì sacciu špiegàri
pijàtiv’a pacènza
jatil’a visitàri.

S’all’ùnnici a dumìnica
vi vena ra gulìja
jat’a ra missa
facitil’a ciotìja.

‘U nn’è ra prèrica
né ru cumpissionàli
ma ri canzùni d’u coro
a rènninu špeciàli.

Ccu’ duji chitarri
accumpàgnann’i prighèri
a ru Signuru
ni putìmu abbicinàri.