Quann’èrumu guagliùni
‘a staggiòna
tutt’i siri
‘u vidìmmu l’ura
ccu’ ra zita i ‘n’accucchjàri
ppì nnì chjudìri
dint’i bbarràcchi
ppì cuminciàri a paparijàri.

Si sti bbarràcchi
putìssiru parràri
e ccu’ ‘na šcusa
‘ncìgnàssiru a cantàri
ni facìssiru accussì mali
pirchì fa mali arricordàri
chiru c’à fàttu antùra
e mmò ‘u pò cchjù fàri.

Av’aspittàri ca facìva scuru
i_d’a bbarràcca niscìvi
tuttu ‘mpocàtu
pp’‘u dari all’occhju
rasent’u muru
manìjati ‘unn’addimuràri
ca m’è ricogghjri
ppì ll’accumpagnàri avi fujìri.

Dduvi si stata?
Špaturnàta ! Adduv’a jùtu?
L’à visti chi uri su, o si ccicàta?
Šcordatill’i niscìri sta simàna
ppì mmò ti castìju
ti nn’è dittu quattru
a prossima vota
ccì le dir’a pàtta.