‘Nt’a si jorni sùnnu tutti
llittrjzzàti ppì l’evèntu
ppì ra prima vota
a Cutròni joca ra Juvèntu.

I st’abbenimèntu
n’ànnu parràtu tutt’i giornali
calabrìsi e cutrunìsi
ma pur’i nazionali.

Doppu ca Moggi & Giraudu
ànnu ‘mbrogghjàtu
a “gnùra”
in seria B ava scinnùtu.

E cci’ànnu carricàtu puru
‘na pènalizzazioni
ma ‘sta šquàtra rànna
‘n’ati duji partiti zzùmpa ru Cutròni.

Ohji ma! Cchì d’è ca sùccidutu
ppì ri bigghjètti !!!
Ppì l’accattàri cchjù d’ancunu
s’à lizàtu a ri quàttru.

Po’ ‘u tti dicu
quànnu s’ànnu funùtu
a ri chjani àvuti d’u špitàlu
s’ànnu ricoveràtu.

S’àvanu saurìti pur’i barèlli
oltr’a ri posti letti
à dùvutu ‘ntervinìri
a Quistùra e ru Prifèttu.

Ccu’ ru špitàlu chjusu
comu fazzu a jiri in geriatrja?
Cc’è ru nonnò
ca sta špittànn’a mmija.

Dint’u campu
‘na šcoppul’amu pijàtu
subb’i šparti
ppì ra cundotta amu vinciùtu.

Ma però a tutti
cci’àmu arricordàtu
c’ara Magna Grecia
amu appartinùtu ‘nt’u passàtu.

A ciràsa subb’a torta
n’à mancàtu
pirchì Galardu u cutrunisi
‘u nn’à signàtu.

Penzica d’u sognu
ancor’‘u nn’àmu rišpigghjàtu
tornàmu subb’a terra
è long’u campiunàtu.

U diciannòvu settèmbri dujimilasèi
a mènt’a mènta tenitìllu
i ra vidìri ccà sta šquàtra ‘n’ata vota
‘nzonnatìllu.

Pirchì mintìri
‘nu limit’a ra pruvidènza
si jamu nuji in seria “A”
cc’è ra špìranza.

Si a ru Presidenti
ccì vèna ru špirnìcchju
portàr’u Cutrònu in seria “A”
fùssa ‘nnu bellu pinzerìcchiu.

E po’ comu si dicia:
“A špìranza è l’urtim’a murìri”
e prim’ì muriri
cc’è chiestu a grazz’a ru Signùru:

Signuru miju! U Cutroni in seria “A” vògghju vidìri.