T’arricòrdi?

Quànnu ‘ncìgna
a niscìri sta palòra
è bruttu sìgnu
vo’ ddiri ca sta ‘mbecchjànnu.

Comu t’a pò risparmiàri
s’affrunti ‘na guagliùna
i chiri tempi
ddrà sutt’u mari?

T’arricordi chiru visu
chiru šguardu, u surrisu
t’arricordi chira vucca dùcia
chiri vàsi, i l’occhji suji a lùcia.

T’arricord’ i siràti ‘mpatàti?
Chira sira ca n’amu ‘mbrigàtu?
A sira c’‘u nn’è hjàtàtu?
A sira ca m’à lassàtu?

“Acqua passàta ‘u macina mulinu”
ma però a mimòrja à funziunàtu
ti para c’à ‘mbecchjàtu!
‘Mbeci si pròpiu ‘ncatojàtu.