Costèggia u maru
sta jonica statàli
i Tarantu a Reggiu
passànnu ppì Cutròni.
‘Na štràta šmalidìtta
štrìtta e traditùra
‘na mulattèra c’‘u ccì po’ jiri
cchjù i cinquant’all’ùra.

Mi ven’a ra menta
mo’ è ‘nu sacch’i tempu
tornànnu d’u pajisu
‘nt’u šcumpartimèntu.
Dùji geometri e ‘nu ‘ngegnèru
ccu’ ri carti àvanu parràtu
i ‘n’autostrata c’ava ddì nèsciri
e ‘unn’à maji šgravàtu.

‘Nt’u discùrzu è capisciùtu
ch’èra a Tarantu-Cutròni
ogni bòta c’a mintumàvanu
mi sintìva cchjù bonu.
Sintènnu ca
c’èra i šparagnàri
ava rrapùtu l’occhji
‘n’assicuratòri.

Stù Vattìsimu
quànnu a ru quàgghju?
Ci vònnu armènu
deci anni i travagghjù.
Ma st’autostrata
‘unn’à maji avutu ‘ndirìzzu
ca ri sordi anu jutu
sempi a ‘n’atu pìzzu.
E mò comu facìmu
ppì sta statàlu
ch’è muru e muru
ccu’ ru špitàlu?
A “štràta d’a morta”
tena comu numinàta!
ppì tutt’a genta
c’ànnu sutterràtu.

Jennu e binènnu
i Catanzàru ppì travagghjàri
i cìgghji d’a štràta
su chjn’i crùci e di hjùri.
Tantu ca ccì nnì sù
a ‘nu certu pùntu
ca par’i ti truvàri
a ru Campusàntu.

Pussìbbili
c’‘u ssì po’ fari nènti
ppì šcampitàri
tutti st’incidènti ?
Pussìbbili ca sta statàlu
à d_èssiri tijàtru
oji mora ancùnu
dumànu ancun’àtu?

N’ànnu parràtu tutti
cumitati, puliticanti e sciosciulèri
‘u l’ànnu sintùti
“u peju sùrdu è chiru c’‘u bbo’ sintìri”.
A ra matinàta
chiru ca fà cchjù ‘ncazzàri
quannu si lìza ru guvèrnu
ccu’ ‘na lèggia, ‘na vita vo’ sarvàri.

Iju ccì dicìssa:
a ri cuntàri pjativi a prìca?
Ma a vuji d’a statàlu 106
cchì binni frìca?
Quànnu vi nn’accurgìti ca
su quantu ‘na guèrra civìli
vi pìja ru šcàntu
‘u sapìti rišpunnìri.

Ppì nuji ‘u ccì su ssòrdi
ppì ra fravicàri
mentr’a ru nòrd
su a ra quinta cursìa.

‘U nn’è ca, ppì chìsta S.S.
comu i nazzìsti vònnu fàri
e tutt’i calabrìsi chjànu chjànu
si vònnu cupàri?

Sincòmu nuji
‘u nnì putìmu pulizzàri
a ri pròssimi votazziòni
facìmuli šcapulàri
… Ma pènzica è mègghju
s’i mannàmu a fatigàri
s’‘u fan’u cuntrattu ccu’ nuji
‘u gghjàmu a botàri.